聽到個消息時真係好擔心, 因為唔知有幾嚴重, 剩係知佢係惡性腫瘤係乙狀結腸, 有一隻雞蛋咁大, 除此之外仲有一粒良性將會變惡性既腫瘤係右側結腸, 加一粒係良性係胃外壁, 即係總數有三粒...

見胃科醫生既時候佢話"胃嗰粒小問題啫, 最緊要搞左腸嗰粒先, 於是排左個快期去見腸科醫生, 醫生睇左腸鏡既相之後覺得未擴散, 所以早D做比較好.

到八月十日去醫院聽"術前服務", 這天係我第一次見到黎啟昌醫生, 期間佢有講過原來照腸鏡都係佢幫我阿爸做既, 同埋已經預留左個做手術既日期俾我阿爸, 佢一路講解個手術有咩風險, 一路俾建議我地, 好細心. 講下講下當阿爸問黎醫生"唔知依家排左期幾時可以做手術呢? 因為都好擔心想盡早做左佢..." 跟住企係黎醫生身邊既姑娘又幫口話"係呀, 我見佢地真係好擔心呀" 我阿媽跟住眼濕濕又話"係呀我真係好擔心佢呀, 因為以前我阿爸都係因為癌症唔係度架..."黎醫生見我地咁, 佢望住份報告, 又睇下阿爸個file, 跟住就話"咁啦, 我安排你下星期一入院, 星期二做手術啦, 好唔好呀?" 我地三人即時呆左, 我地有冇聽錯? 咁快? 阿爸就梗係話好啦. 就係咁, 就決定左八月十八日做手術喇. 再者, 我地分別又見左造口姑娘, 麻醉師, 傷口護理姑娘...由早上九點搞到下午三點. 返到屋企, 阿爸仲話要感恩, 因為神幫佢安排先可以咁快做到手術.