因為大家的交通問題, 最後我們選擇了中午十二點半的船往塔門出發, 不要以為中午時分無咩人搭, 其實都爆架, 去到塔門都已經一點八, 因為我地有帶乾糧, 所以並冇幫襯島上食店, 一落船第一件事就係去洗手間 , 等各位"放低幾兩"既時候見到碼頭上有居民係度賣生晒特產, 都幾吸引同特色, 等齊人後, 跟住就開始我地既塔門之旅喇.

第一站係榕樹村同漁民新村. 當我地行經村民住既地方時, 成日都會見到佢地係門前晒蝦, 其中一間既門頂仲有個燕子巢  嘩~ 真係要係呢D離島先可以見得返呢D小時候既情景呀! 離開左漁民新村我地經過左一段袓墳, 跟住就去到疊石, 望出去水連天既風景加上海風真係好開心! 今次因為同屋企人去, 所以並無落去近睇疊石既諗法, 但係我地D後生就拎住部相機影個不停! 呢度有好多人露營, 亦有市區見唔到既牛牛同牛屎. 係疊石差不多成粒鐘之後, 終於都要行人, 向下一個景點觀景台進發!

係觀景台對出岸邊有一個石灘, 冇錯係石灘唔係沙灘! 成個石灘都係石春, 行到石灘既盡頭係一D相對較細既石春, 係度你可以聽到大自然既交響樂 (又一兒時親親大自然既回憶 ) 超正!!! 為左聽呢D咁好聽既交響樂, 我會再去過既  

之後佢地就落左去天后廟, 去到天后廟見都只不過三點半, 於是乎就問下大家想點, 有兩個選擇, 一係落村口冰室食下午茶, 一係就挑戰高難度行去茅平山. 經過眾人投票我地決定向高難度挑戰!

其實我地當中冇人去過茅平山, 黎過既都只不過係疊石同天后廟行左一圈. 所以之後既路都只係我地前一日係網上website(s)搵到前人行過既資料跟據去行, 點知都係行錯路, 因為我地行左條灌木小徑, 行左十五分鐘左右, 去到一小草坪, 腳下正是龍頸筋景點, 但所在位置只可以遠眺弓洲著名既景點獅子滾球(屋企人不停咁話:邊度似獅子呀? 點睇都唔似喎...) 同埋半個赤洲, 唔知係咪因為之前既灌木小徑嚇親佢地, 行到呢度佢地個個都話唔再行喇, 於是我地由原路落番去觀景亭, 天后廟, 碼頭士多, 到碼頭時剛好四時五十五分, 趕上了五點零五分開出去黃石碼頭既船.

到黃石碼頭之後, 我地坐94號巴士出到西貢市食埋海鮮餐才滿足地回家

有機會再去的話, 我要再次挑戰茅坪山同埋聽交響樂~